Ամունդի-ԱԿԲԱ-ն միանում է կորոնավիրուսի դեմ պայքարին

Wednesday 25 March 2020

«ԱՄՈՒՆԴԻ-ԱԿԲԱ ԱՍԵԹ ՄԵՆԵՋՄԵՆԹ» ՓԲԸ-Ն ՍԵՓԱԿԱՆ ՇԱՀՈՒՅԹԻՑ 5 ՄԼՆ ԴՐԱՄ Է ՓՈԽԱՆՑԵԼ ՀԱՅԱՍՏԱՆՈՒՄ ՆՈՐ ԿՈՐՈՆԱՎԻՐՈՒՍԻ (COVID-19) ԿԱՆԽԱՐԳԵԼՄԱՆՆ ՈՒ ՀԱՂԹԱՀԱՐՄԱՆՆ ՈՒՂՂՎԱԾ ՄԻՋՈՑԱՌՈՒՄՆԵՐԻՆ ԱՋԱԿՑԵԼՈՒ ՆՊԱՏԱԿՈՎ

Ցանկանալով իր ներդրումն ունենալ ոչ միայն ապագա կենսաթոշակառուների առողջության ու անվտանգության հարցում, այլեւ ներկայիս կենսաթոշակառուների, ցածր իմունային համակարգ և խրոնիկական հիվանդություններ ունեցող անձանց առողջության պահպանման գործում, «Ամունդի-ԱԿԲԱ Ասեթ Մենեջմենթ» ՓԲԸ-ն ընդլայնել է Ընկերության Կորպորատիվ Սոցիալական Պատասխանատվության շրջանակն ու սեփական շահությից 5 մլն դրամ փոխանցել ՀՀ ֆինանսների նախարարության կողմից բացված գանձապետական հաշվին, որին փոխանցված միջոցներն ուղղվելու են բժշկական անձնակազմի խրախուսման, բժշկական պարագաների և սարքավորումների ձեռք բերման, ինչպես նաև բժշկական կենտրոնների շենքային պայմանների բարելավման ուղղությամբ։

Միևնույն ժամանակ, «Ամունդի-ԱԿԲԱ Ասեթ Մենեջմենթ» ՓԲԸ-ն, մայր Ընկերության ընթացակարգերին համապատասխան, կոչ է անում բոլոր գործատուներին՝ աշխատակիցներին հնարավորինս ապահովել հեռահար կապով և խրախուսել տանից աշխատանքը։ Մենք հավատում ենք, որ բիզնեսներն ու գործատուները միասին կարող են մեղմել կորոնավիրուսի տարածումը՝ հոգ տանելով աշխատակիցների և շրջապատի մասին։